వలసలపై ఉక్కుపాదం మోపుతున్న ట్రంప్ సర్కారు మరో వీసా ఫీజును తెరపైకి తెచ్చింది. అమెరికాలో ఉద్యోగాలు చేస్తున్న భారతీయులకు ఇది బిగ్ షాక్ అనే చెప్పాలి. ఎందుకంటే, ఇప్పటికే హెచ్-1బీ వీసాల విషయంలో కఠిన నిబంధనలు తీసుకొస్తున్న ట్రంప్ సర్కార్.. ఇప్పుడు వీసా రెన్యువల్స్పైనా అదనపు ఫీజు విధించే దిశగా అడుగులు వేస్తోంది. ముఖ్యంగా హెచ్-1బీ, ఎల్-1 వీసాలపై ఆధారపడే పెద్ద టెక్, ఐటీ కంపెనీలపై ఈ ప్రతిపాదన ప్రభావం చూపే అవకాశం ఉంది. అసలు ఈ కొత్త ఫీజు ఎవరికి వర్తిస్తుంది? ఎంత చెల్లించాల్సి ఉంటుంది? భారతీయ ఉద్యోగులపై దీని ప్రభావం ఎంత?
అమెరికాలో ఉద్యోగాలు చేస్తున్న విదేశీ నిపుణులకు హెచ్-1బీ, ఎల్-1 వీసాలు కీలకం. ముఖ్యంగా భారతీయ ఐటీ ప్రొఫెషనల్స్లో చాలామంది ఈ వీసాలపైనే అమెరికాలో తమ ఉద్యోగాలను కొనసాగిస్తున్నారు. అయితే ఇప్పుడు అలాంటి ఉద్యోగులను కొనసాగించేందుకు కంపెనీలు మరింత ఖర్చు చేయాల్సి వచ్చే అవకాశం కనిపిస్తోంది.
ట్రంప్ ప్రభుత్వం హెచ్-1బీ, ఎల్-1 వీసాల రెన్యువల్ లేదా ఎక్స్టెన్షన్ పిటిషన్లపైనా అదనపు ఫీజు విధించే ప్రతిపాదనను ముందుకు తీసుకొస్తోంది. ఇందుకోసం ప్రస్తుతం ఉన్న ‘9-11 రెస్పాన్స్ అండ్ బయోమెట్రిక్ ఎంట్రీ-ఎగ్జిట్ ఫీజు’ పరిధిని విస్తరించేలా నిబంధనలను రూపొందిస్తోంది. ఈ ప్రతిపాదన ప్రస్తుతం ఫైనల్ రూల్మేకింగ్ దశలో ఉన్నప్పటికీ.. ఇంకా అమల్లోకి రాలేదు.
అసలు ఈ ఫీజు ఎవరికి వర్తిస్తుంది? అమెరికాలో 50 లేదా అంతకంటే ఎక్కువ మంది ఉద్యోగులు ఉన్న కంపెనీల్లో.. సగానికి పైగా ఉద్యోగులు హెచ్-1బీ లేదా ఎల్-1 స్టేటస్లో ఉంటే.. ఆ కంపెనీలకు ఈ అదనపు ఫీజు వర్తించే అవకాశం ఉంది. అంటే ప్రధానంగా విదేశీ నిపుణులపై ఎక్కువగా ఆధారపడే పెద్ద టెక్నాలజీ, ఐటీ సర్వీసెస్ కంపెనీలపై దీని ప్రభావం ఎక్కువగా ఉండొచ్చు.
ప్రస్తుతం అర్హత కలిగిన సంస్థలు కొత్త హెచ్-1బీ ఉద్యోగిని అమెరికాలోకి తీసుకురావడానికి లేదా ఉద్యోగి ఎంప్లాయర్ మారినప్పుడు అదనంగా 4 వేల డాలర్ల ఫీజు చెల్లించాల్సి ఉంటుంది. ఎల్-1 పిటిషన్లకు ఈ అదనపు ఫీజు 4,500 డాలర్లుగా ఉంది. అయితే కొత్త ప్రతిపాదన అమల్లోకి వస్తే.. ఉద్యోగి అమెరికాలోనే కొనసాగుతూ వీసాను ఎక్స్టెండ్ చేసుకునే సమయంలో కూడా ఇదే తరహా అదనపు ఫీజు చెల్లించాల్సి రావచ్చు.
ఇక్కడే భారతీయ ఉద్యోగులకు ఈ అంశం కీలకంగా మారుతోంది. అమెరికా పౌరసత్వం, ఇమ్మిగ్రేషన్ సర్వీసెస్.. USCIS వెల్లడించిన 2025 ఆర్థిక సంవత్సరం గణాంకాలను పరిశీలిస్తే.. హెచ్-1బీ అనుమతుల్లో ఎక్కువ భాగం కొత్తగా అమెరికాకు వచ్చే ఉద్యోగుల కోసం కాకుండా.. ఇప్పటికే అమెరికాలో పనిచేస్తున్న ఉద్యోగుల కొనసాగింపునకు సంబంధించినవే.
2025 సెప్టెంబర్ 30తో ముగిసిన ఆర్థిక సంవత్సరంలో దాదాపు 4.06 లక్షల హెచ్-1బీ పిటిషన్లు ఆమోదం పొందాయి. వీటిలో సుమారు 2.91 లక్షలు.. అంటే దాదాపు 71 శాతం.. ఇప్పటికే అమెరికాలో పనిచేస్తున్న ఉద్యోగుల కొనసాగింపునకు సంబంధించినవే. అంటే హెచ్-1బీ వీసా ఎక్స్టెన్షన్స్కు ఈ అదనపు ఫీజు వర్తిస్తే.. కంపెనీలపై దాని ప్రభావం గణనీయంగా ఉండే అవకాశం ఉంది.
ముఖ్యంగా భారతీయుల విషయంలో ఈ ప్రభావం మరింత ఎక్కువగా ఉండొచ్చని గణాంకాలు సూచిస్తున్నాయి. 2025 ఆర్థిక సంవత్సరంలో ప్రారంభ మూడు సంవత్సరాల గడువు దాటి హెచ్-1బీ వీసా ఎక్స్టెన్షన్ పొందిన వారిలో భారతీయుల సంఖ్య భారీగా ఉంది. దాదాపు 2.26 లక్షల మంది భారతీయులకు హెచ్-1బీ ఎక్స్టెన్షన్స్ ఆమోదం పొందినట్లు గణాంకాలు చెబుతున్నాయి. ఇది మొత్తం హెచ్-1బీ ఎక్స్టెన్షన్ ఆమోదాల్లో దాదాపు 77.6 శాతంగా ఉంది.
అంటే అమెరికాలో ఇప్పటికే ఉద్యోగాలు చేస్తున్న భారతీయులను కొనసాగించేందుకు కంపెనీలు చేసే వీసా ఎక్స్టెన్షన్ ప్రక్రియపైనా అదనపు ఫీజు వస్తే.. భారతీయ ప్రొఫెషనల్స్పై పరోక్షంగా ప్రభావం పడే అవకాశం ఉంది. అయితే ఈ ఫీజును నేరుగా ఉద్యోగులే చెల్లించాలా? లేక కంపెనీలే భరించాలా? అనేది ఉద్యోగ ఒప్పందాలు, కంపెనీ విధానాలు, తుది నిబంధనలపై ఆధారపడి ఉంటుంది.
ఇక ఈ ప్రతిపాదన ప్రభావం పెద్ద టెక్ కంపెనీలపై ఎంత ఉంటుందన్నదీ ఆసక్తికరంగా మారింది. 2025 ఆర్థిక సంవత్సరంలో కొనసాగుతున్న ఉద్యోగాలకు సంబంధించి అత్యధిక హెచ్-1బీ పిటిషన్ ఆమోదాలు అమెజాన్కు వచ్చాయి. ఆ తర్వాత టాటా కన్సల్టెన్సీ సర్వీసెస్, మైక్రోసాఫ్ట్, మెటా, యాపిల్, గూగుల్ వంటి సంస్థలు ఉన్నాయి.
అయితే ఈ గణాంకాలు ప్రత్యేకమైన ఉద్యోగుల సంఖ్యను సూచించవు. ఒకే హెచ్-1బీ ఉద్యోగికి ఏడాదిలో ఉద్యోగ మార్పు, వర్క్ లొకేషన్ మార్పు వంటి కారణాలతో ఒకటి కంటే ఎక్కువ పిటిషన్లు ఆమోదం పొందే అవకాశం ఉంటుంది. అయినప్పటికీ.. విదేశీ నిపుణులపై ఆధారపడే కంపెనీలకు వీసా ఫీజుల పెంపు ఎంతటి ఆర్థిక భారాన్ని మోపగలదో ఈ గణాంకాలు స్పష్టం చేస్తున్నాయి.
ఇప్పటికే ట్రంప్ ప్రభుత్వం ఇమ్మిగ్రేషన్ విధానాల్లో కఠిన వైఖరి అవలంబిస్తోంది. ఈ నేపథ్యంలో హెచ్-1బీ, ఎల్-1 వీసా ఎక్స్టెన్షన్(Extension) పై అదనపు ఫీజు ప్రతిపాదన రావడం.. అమెరికాలో పనిచేస్తున్న భారతీయ ఐటీ ప్రొఫెషనల్స్లో ఆందోళన రేకెత్తిస్తోంది..
అయితే ఒక విషయం గుర్తుంచుకోవాలి. ఈ కొత్త ఫీజు ఇంకా అమల్లోకి రాలేదు. ఈ ప్రతిపాదన ప్రస్తుతం ఫైనల్ రూల్మేకింగ్ స్టేజ్ లో ఉంది. ప్రభుత్వం తుది నిర్ణయం ప్రకటించిన తర్వాతే.. ఎప్పటి నుంచి అమల్లోకి వస్తుంది? ఎవరెవరికి వర్తిస్తుంది? ఏ పిటిషన్లకు ఎంత ఫీజు చెల్లించాలి? అనే అంశాలపై పూర్తి స్పష్టత వచ్చే అవకాశం ఉంది.
మొత్తంగా చూస్తే.. హెచ్-1బీ, ఎల్-1 వీసా రెన్యువల్స్పై అదనపు ఫీజు అమల్లోకి వస్తే.. కంపెనీలపై భారం పెరిగే అవకాశం ఉంది. ముఖ్యంగా భారతీయులపై దీని ప్రభావం ఎక్కువగా ఉండొచ్చు. మరి ఈ కొత్త నిబంధనలు ఎప్పటి నుంచి అమల్లోకి వస్తాయో చూడాలి.
Leave a Reply