ఫుకెట్ నుంచి ఢిల్లీకి బయలుదేరిన ఎయిర్ ఇండియా విమానంలో చోటుచేసుకున్న భారీ కుదుపుల ఘటన విమానయాన రంగంలో తీవ్ర చర్చకు దారితీసింది. విమానం గాల్లో ఉండగా ఒక్కసారిగా దాదాపు 300 అడుగుల ఎత్తును కోల్పోవడం, పలువురు ప్రయాణికులు, సిబ్బంది గాయపడటం, ఆ తర్వాత వరుసగా పలు సాంకేతిక హెచ్చరికలు నమోదవడం కలకలం రేపింది. దీనికి తోడు విమానం కెప్టెన్ నిర్వహించిన డోప్ టెస్ట్లో పాజిటివ్ ఫలితం రావడం మరింత చర్చనీయాంశంగా మారింది.
అసలేం జరిగింది?
ఆగస్టు 4న ఫుకెట్ నుంచి ఢిల్లీకి బయలుదేరిన ఎయిర్ ఇండియా AI-2379 విమానంలో 137 మంది ప్రయాణికులు, 8 మంది సిబ్బంది ఉన్నారు. ప్రయాణం ప్రారంభమైన దాదాపు రెండు గంటల తర్వాత ప్రయాణికులు భోజనం ముగించుకుని విశ్రాంతి తీసుకుంటున్న సమయంలో విమానం ఒక్కసారిగా భారీ కుదుపులకు గురైంది.
ఒక్కసారిగా విమానం కిందికి కదలడంతో సీటు బెల్ట్ పెట్టుకోని ప్రయాణికులు, సిబ్బంది పైకి ఎగిరిపడ్డారు. ఈ ఘటనలో కనీసం 20 మంది ప్రయాణికులు, నలుగురు సిబ్బంది గాయపడినట్లు సమాచారం.
300 అడుగులు ఎందుకు కిందికి వెళ్లింది?
ఘటనకు ముందు విమానం నిలిచిపోయే ప్రమాదం ఉందన్న హెచ్చరికలు కో-పైలట్కు వచ్చినట్లు అంతర్గత భద్రతా నివేదికలో పేర్కొన్నట్లు సమాచారం. అదే సమయంలో ఆటోపైలట్ కూడా పనిచేయడం ఆగిపోయింది.
విమానం ముందు భాగం పైకి లేచిన పరిస్థితిలో.. కో-పైలట్ శిక్షణలో నేర్చుకున్న అత్యవసర చర్యను చేపట్టి విమానం ముక్కును కిందికి వంచినట్లు తెలుస్తోంది. దీంతో విమానం కొన్ని క్షణాల్లోనే దాదాపు 300 అడుగుల ఎత్తును కోల్పోయింది.
ఈ సమయంలో విమానం మైనస్ వన్ జీ స్థాయికి వెళ్లినట్లు హెచ్చరిక నమోదైంది. అంటే ప్రయాణికులు, సిబ్బంది తమ బరువును సాధారణంగా అనుభవించలేని స్థాయిలో కొద్దిసేపు గాల్లో తేలిపోయే పరిస్థితి ఏర్పడింది.
చివరకు కెప్టెన్ కాక్పిట్లో నియంత్రణను తీసుకుని ఇంజిన్లకు గరిష్ఠ నిరంతర శక్తిని అందించారు. దీంతో విమానం తిరిగి వేగం, ఎత్తును సాధించి అదుపులోకి వచ్చినట్లు సమాచారం.
80 నిమిషాల్లో 13 సాంకేతిక ఫాల్ట్లు
విమానం కుదుపుల నుంచి బయటపడిన తర్వాత కూడా సాంకేతిక హెచ్చరికలు కొనసాగినట్లు తెలుస్తోంది. ఘటన తర్వాత నమోదైన పోస్ట్-ఫ్లైట్ రిపోర్ట్ ప్రకారం దాదాపు 80 నిమిషాల వ్యవధిలో 13 సాంకేతిక ఫాల్ట్లు నమోదైనట్లు సమాచారం.
ఉదయం 4 గంటల 2 నిమిషాలకు గ్రీన్, బ్లూ, ఎల్లో మూడు హైడ్రాలిక్ వ్యవస్థల్లో లో-ప్రెజర్ హెచ్చరికలు నమోదయ్యాయి. బ్లూ, ఎల్లో రిజర్వాయర్లలో ద్రవం స్థాయి తగ్గినట్లు కూడా అలర్ట్ వచ్చినట్లు తెలుస్తోంది.
విమానంలోని నియంత్రణలు, ల్యాండింగ్ గేర్, బ్రేకులు వంటి కీలక వ్యవస్థల పనితీరులో హైడ్రాలిక్ వ్యవస్థలు ముఖ్యమైన పాత్ర పోషిస్తాయి. అందుకే మూడు హైడ్రాలిక్ వ్యవస్థలకు ఒకేసారి సంబంధించిన హెచ్చరికలు రావడం దర్యాప్తులో కీలక అంశంగా మారింది.
ఎలివేటర్లు, ఆటోపైలట్లోనూ సమస్యలు
ఇదే సమయంలో లెఫ్ట్, రైట్ ఎలివేటర్లలో కూడా ఫాల్ట్లు నమోదైనట్లు సమాచారం. విమానం ముక్కును పైకి లేదా కిందికి నియంత్రించడంలో ఎలివేటర్లు కీలకంగా పనిచేస్తాయి.
ఆటోపైలట్ డిస్కనెక్ట్ కావడంతో పాటు కొద్దిసేపటి తర్వాత మరోసారి డిస్కనెక్ట్ అయినట్లు తెలుస్తోంది. దీంతో విమానం నియంత్రణ వ్యవస్థల్లో వరుసగా పలు హెచ్చరికలు నమోదయ్యాయి.
అయితే ఈ లోపాలన్నింటికీ ఒకే మూలకారణమా? లేక భారీ కుదుపుల సమయంలో వేర్వేరు సెన్సర్లు స్పందించడం వల్లే ఈ అలర్ట్లు నమోదయ్యాయా? అన్నది ఇంకా స్పష్టంగా తెలియాల్సి ఉంది.
ఎమర్జెన్సీ ఎగ్జిట్ డోర్లకు కూడా అలర్ట్లు
విమానం ఎమర్జెన్సీ ఎగ్జిట్ డోర్లకు సంబంధించిన హెచ్చరికలు కూడా నమోదైనట్లు సమాచారం. రైట్ ఫార్వర్డ్ ఎమర్జెన్సీ ఎగ్జిట్ డోర్కు రెండుసార్లు అలర్ట్ రావడంతో పాటు.. ఒక నిమిషం తర్వాత రైట్ ఆఫ్ట్ ఎమర్జెన్సీ ఎగ్జిట్ డోర్కు కూడా అలర్ట్ వచ్చినట్లు తెలుస్తోంది.
భారీ కుదుపుల కారణంగా క్యాబిన్లో ఏర్పడిన అంతరాయంతో సెన్సర్లు స్పందించాయా? లేక డోర్లలో నిజంగానే ఏదైనా సాంకేతిక సమస్య ఏర్పడిందా? అన్నది దర్యాప్తులో తేలాల్సి ఉంది.
ఘటన జరిగిన 44 నిమిషాల తర్వాత ఇంజిన్-1 యాంటీ-ఐస్ సిస్టమ్లో కూడా ఫాల్ట్ నమోదైనట్లు సమాచారం.
ఢిల్లీలో ముందుగానే వైద్య ఏర్పాట్లు
కుదుపుల సమయంలో పలువురు ప్రయాణికులు, క్యాబిన్ సిబ్బందికి గాయాలైనట్లు గుర్తించారు. దీంతో విమానం ఢిల్లీలో ల్యాండ్ అయ్యే సమయానికి వైద్య సిబ్బంది, అంబులెన్స్లు, అవసరమైన వైద్య నిపుణులను సిద్ధంగా ఉంచాలని ఎయిర్ ట్రాఫిక్ కంట్రోల్ను కోరినట్లు సమాచారం.
చివరకు విమానం ఢిల్లీలో సురక్షితంగా ల్యాండ్ అయింది.
కెప్టెన్ డోప్ టెస్ట్లో పాజిటివ్!
ఇక ఈ ఘటన తర్వాత కెప్టెన్కు సంబంధించిన మరో అంశం తెరపైకి వచ్చింది. విమానం ఎక్కే సమయంలో కెప్టెన్ మత్తులో ఉన్నట్టుగా కనిపించారని ఓ ప్రయాణికుడు ఆరోపించాడు. కెప్టెన్ నెమ్మదిగా స్పందించారని, కళ్లూ ఎర్రగా కనిపించాయని అతడు చెప్పాడు.
అయితే ఇవి ప్రయాణికుడు చేసిన ఆరోపణలు మాత్రమే. కెప్టెన్ నిజంగా మత్తులో ఉన్నారని నిర్ధారించే ఆధారం తన వద్ద లేదని కూడా అతడు పేర్కొన్నాడు.
అయితే ఘటన తర్వాత నిబంధనల ప్రకారం నిర్వహించిన డోప్ టెస్ట్లు ఇప్పుడు కీలకంగా మారాయి. తీవ్ర విమాన ఘటనల అనంతరం ఇద్దరు పైలట్లకు పరీక్షలు నిర్వహించినట్లు సమాచారం.
కో-పైలట్ పరీక్షలో ఎలాంటి సమస్య కనిపించలేదని తెలుస్తోంది. అయితే కెప్టెన్కు నిర్వహించిన తొలి పరీక్షలో పాజిటివ్ ఫలితం వచ్చినట్లు సమాచారం. తాజాగా నిర్వహించిన రెండో పరీక్షలోనూ పాజిటివ్ ఫలితమే వచ్చినట్లు అధికార వర్గాలు చెబుతున్నాయి.
రెండో పరీక్షలో గంజాయి వినియోగానికి సంబంధించిన ఫలితం వచ్చినట్లు సమాచారం. ప్రస్తుతం ఇద్దరు పైలట్లను విధులకు దూరంగా ఉంచినట్లు తెలుస్తోంది.
అయితే కెప్టెన్ డోప్ టెస్ట్ ఫలితానికి విమానం 300 అడుగుల ఎత్తు కోల్పోయిన ఘటనకు ఏమైనా సంబంధం ఉందా? అన్నది దర్యాప్తులో తేలాల్సి ఉంది.
ఏఏఐబీ దర్యాప్తు
ఈ ఘటనను డీజీసీఏ తీవ్రంగా పరిగణించినట్లు సమాచారం. విమాన ప్రమాద దర్యాప్తు సంస్థ ఏఏఐబీ సమగ్ర దర్యాప్తు చేపట్టింది.
విమానం సాంకేతిక పరిస్థితి, ఫ్లైట్ డేటా, నిర్వహణ రికార్డులు, కాక్పిట్ వ్యవస్థల లాగ్లు, వైద్య పరీక్షల వివరాలు, పైలట్లు, ఇతర సంబంధిత వ్యక్తుల వాంగ్మూలాలను అధికారులు పరిశీలిస్తున్నట్లు తెలుస్తోంది.
కేవలం పోస్ట్-ఫ్లైట్ రిపోర్ట్, ఈకామ్ లాగ్ల ఆధారంగా తుది నిర్ణయానికి రావడం సాధ్యం కాదని నిపుణులు చెబుతున్నారు. మూడు హైడ్రాలిక్ వ్యవస్థల్లో ఒకేసారి లో-ప్రెజర్ అలర్ట్లు రావడం, రెండు ఎలివేటర్లలో ఫాల్ట్లు నమోదవడం, ఆటోపైలట్ డిస్కనెక్ట్ కావడం, డోర్ అలర్ట్లు రావడం వంటి అంశాల మధ్య సంబంధాన్ని అధికారులు నిర్ధారించాల్సి ఉంది.
అసలు కారణం ఏంటి?
ఈ ఘటనలో ప్రస్తుతం ప్రధానంగా పలు ప్రశ్నలు తలెత్తుతున్నాయి.
విమానం ముందుగా ఎందుకు పైకి లేచింది? ఆ తర్వాత ఒక్కసారిగా దాదాపు 300 అడుగులు ఎందుకు కిందికి వెళ్లింది? కో-పైలట్ తీసుకున్న అత్యవసర చర్యే ఈ కుదుపులకు ప్రధాన కారణమా? లేక అంతకుముందే విమానం నియంత్రణ వ్యవస్థల్లో ఏదైనా లోపం ఏర్పడిందా?
మూడు హైడ్రాలిక్ వ్యవస్థల్లో ఒకేసారి లో-ప్రెజర్ అలర్ట్లు ఎందుకు వచ్చాయి? ఎలివేటర్లు, ఆటోపైలట్, డోర్ సెన్సర్లు, ఇతర సాంకేతిక హెచ్చరికలకు మూల కారణం ఏమిటి? కెప్టెన్ డోప్ టెస్ట్ ఫలితాలకు ఈ ఘటనతో ఏమైనా సంబంధం ఉందా? అనే ప్రశ్నలకు ప్రస్తుతానికి స్పష్టమైన సమాధానం లేదు.
కేంద్రం స్పందన
మరోవైపు కేంద్ర విమానయాన మంత్రి రామ్ మోహన్ నాయుడు కూడా ఘటనపై స్పందించారు. విమానయాన భద్రతకు అత్యంత ప్రాధాన్యం ఇస్తున్నామని, భద్రత విషయంలో విమానయాన సంస్థలు, నియంత్రణ సంస్థలు ఎలాంటి రాజీ పడకూడదని స్పష్టం చేసినట్లు సమాచారం.
దర్యాప్తు తర్వాతే అసలు నిజం
మొత్తంగా చూస్తే.. ఫుకెట్-ఢిల్లీ AI-2379 విమాన ఘటనలో భారీ కుదుపులు, మైనస్ జీ పరిస్థితి, దాదాపు 300 అడుగుల ఎత్తు కోల్పోవడం ఒకవైపు ఆందోళన కలిగిస్తే.. మరోవైపు మూడు హైడ్రాలిక్ వ్యవస్థలు, ఎలివేటర్లు, ఆటోపైలట్, ఎమర్జెన్సీ ఎగ్జిట్ డోర్లు సహా పలు సాంకేతిక హెచ్చరికలు నమోదయ్యాయి.
దీనికి తోడు కెప్టెన్ డోప్ టెస్ట్ అంశం కూడా తెరపైకి వచ్చింది. అయితే వీటిలో ఏది అసలు కారణం? ఏది ఘటన తర్వాత ఏర్పడిన పరిణామం? అన్నది ప్రస్తుతం స్పష్టంగా లేదు.
ఏఏఐబీ దర్యాప్తు పూర్తయిన తర్వాతే ఈ ఘటనకు అసలు కారణం ఏమిటన్న దానిపై స్పష్టత వచ్చే అవకాశం ఉంది.
Leave a Reply