Honeymoon Tragedy : నగ్నంగా రక్తమడుగులో భార్య.. ముస్సోరీలో ఆ రాత్రి..ఏం జరిగింది?

సంచలనం రేపుతోన్న హనీమూన్‌ ఉదంతం..
రక్తపు మడుగులో నగ్నంగా పడున్న భార్య..
రంగంలోకి ఫోరెన్సిక్ టీమ్..
హోటల్‌ రూమ్‌లో మద్యం సీసాలు..
అల్లుడిపైనే అనుమానమన్న అత్తమామలు..
భర్తను అదుపులోకి తీసుకున్న పోలీసులు..
ముస్సోరీ హనీమూన్‌లో అసలేం జరిగింది?

అసలేం జరిగింది?

విశాఖపట్నంకు చెందిన పి. రాధా గాయత్రి (27), పుణెకు చెందిన సౌమ్య శ్రీచరణ్‌లకు గతేడాది నవంబర్ 8న వివాహం జరిగింది. గాయత్రి గురుగ్రామ్‌లోని ఒక ప్రముఖ ఐటీ సంస్థలో పనిచేస్తూ ఢిల్లీలో నివసిస్తోంది. వీరిద్దరూ తమ హనీమూన్ ప్లాన్‌లో భాగంగా జూన్ 13న ఢిల్లీ నుంచి బయలుదేరి రిషికేశ్‌ చేరుకున్నారు. అనంతరం జూన్ 14 రాత్రి 11:30 గంటల సమయంలో ముస్సోరీ-ధనోల్టి రోడ్డులోని ఒక హోమ్‌స్టేలో చెక్-ఇన్ అయ్యారు.

మరుసటి రోజు, అంటే జూన్ 15 ఉదయం 7:30 గంటల ప్రాంతంలో హోమ్‌స్టే సిబ్బంది గదిని సందర్శించగా షాకింగ్ దృశ్యం కనిపించింది. గాయత్రి నగ్నంగా, ముక్కు నుంచి రక్తం కారుతుండగా, రక్తపు మడుగులో అచేతనంగా పడి ఉంది. గదిలో రెండు ఖాళీ మద్యం సీసాలు పడి ఉన్నాయి. సిబ్బంది సమాచారం మేరకు పోలీసులు సంఘటనా స్థలానికి చేరుకుని గాయత్రిని పరిశీలించగా, ఆమె అప్పటికే మరణించినట్లు నిర్ధారించారు.

భర్త శ్రీచరణ్ వాదన – పోలీసుల అనుమానం

ఘటన జరిగిన వెంటనే పోలీసులు భర్త శ్రీచరణ్‌ను అదుపులోకి తీసుకుని విచారించారు. తాము ఇద్దరం కలిసి మద్యం సేవించి, తెల్లవారుజామున 3:30 గంటలకు పడుకున్నామని, ఉదయాన్నే లేచి చూసేసరికి భార్య అపస్మారక స్థితిలో ఉందని, ఆమె ముక్కు నుంచి రక్తం కారుతోందని శ్రీచరణ్ పోలీసులకు చెప్పాడు. అయితే, అతని వాదనలో పొంతన లేకపోవడంతో పోలీసులు కేసును అన్ని కోణాల్లో దర్యాప్తు చేస్తున్నారు. మృతదేహాన్ని పోస్టుమార్టం కోసం డెహ్రాడూన్‌లోని కరోనేషన్ ఆసుపత్రికి తరలించారు. కేసు తీవ్రత దృష్ట్యా, వైద్య నిపుణుల ప్రత్యేక ప్యానెల్‌తో పోస్టుమార్టం నిర్వహించి, ఆ ప్రక్రియ మొత్తాన్ని వీడియో రికార్డింగ్ చేయాలని పోలీసు ఉన్నతాధికారులు ఆదేశించారు.

తల్లిదండ్రుల ఫిర్యాదు – సంచలన విషయాలు

ఈ మరణంపై రాధా గాయత్రి తల్లిదండ్రులు సత్యవతి, సుధాకర్‌లు తీవ్ర ఆరోపణలు చేశారు. గురువారం విశాఖపట్నం డీసీపీ మణికంఠకు ఫిర్యాదు చేసిన వారు, తమ అల్లుడు శ్రీచరణ్ ప్రవర్తనపై పలు అనుమానాలు వ్యక్తం చేశారు. శ్రీచరణ్ అతిగా అనుమానిస్తుండేవాడని, గాయత్రికి తెలియకుండా ఆమె బ్యాగ్‌లో ‘ట్రాకర్’ పెట్టాడని, ఆఫీస్ నుంచి ఇంటికి వచ్చే దారిలో ఎవరిని కలిశారనేది కూడా వాచ్‌మెన్‌ను అడిగి తెలుసుకునేవాడని గాయత్రి ఫోన్ చేసి చెప్పిందని వారు వాపోయారు. జనవరి 7వ తేదీన తన బ్యాగ్‌లో ట్రాకర్ ఉందని తెలుసుకున్న గాయత్రి తీవ్రంగా ఆవేదన చెందిందని తల్లి కన్నీరుమున్నీరయ్యారు.

దర్యాప్తు ఏ దశలో ఉంది?

గాయత్రి తల్లిదండ్రుల ఆరోపణలు, మరణించిన తీరు, భర్త ప్రవర్తన వెరసి ఈ కేసులో అనేక సందేహాలకు తావిస్తున్నాయి. అతిగా మద్యం సేవించడం వల్ల జరిగిన ప్రమాదమా? లేక శ్రీచరణ్ ముందే పథకం వేసి చేసిన హత్యనా? అనే కోణంలో ఉత్తరాఖండ్ పోలీసులు విచారణ ముమ్మరం చేశారు. పోస్టుమార్టం నివేదిక రాగానే మరిన్ని స్పష్టమైన ఆధారాలు లభిస్తాయని పోలీసులు భావిస్తున్నారు.

విశాఖలో ఉన్న గాయత్రి తల్లిదండ్రులు, ఈ ఘటనపై సమగ్ర విచారణ జరిపి తమకు న్యాయం చేయాలని, దోషులను కఠినంగా శిక్షించాలని ప్రభుత్వాన్ని కోరుతున్నారు. ఏడు నెలల క్రితమే అంగరంగ వైభవంగా పెళ్లి జరిగిన ఈ జంట, విహారయాత్రలో ఇలా విడిపోవడం పట్ల గాయత్రి బంధుమిత్రులు తీవ్ర దిగ్భ్రాంతికి లోనయ్యారు. ఈ ఘటన ముస్సోరీలోని హోమ్‌స్టేల భద్రతపై కూడా పెద్ద ఎత్తున చర్చకు దారితీస్తోంది.