Unexpected Tragedy : లోహగడ్ కోటలో విషాదం: కాబోయే భార్య పుట్టినరోజు వేడుకల్లో పాల్గొనేందుకు వెళ్లి ప్రాణాలు కోల్పోయిన యువ వ్యాపారవేత్త

మహారాష్ట్రలోని లోనావాలా సమీపంలో ఉన్న చారిత్రక లోహగడ్ కోట వద్ద ఒక హృదయ విదారక ఘటన చోటుచేసుకుంది. తన కాబోయే భార్య పుట్టినరోజు వేడుకలను జరుపుకునేందుకు స్నేహితులతో కలిసి అక్కడికి వెళ్లిన పుణెకు చెందిన 26 ఏళ్ల యువ రియల్ ఎస్టేట్ వ్యాపారవేత్త కేతన్ విశాల్ అగర్వాల్ ప్రమాదవశాత్తూ లోయలో పడి మరణించారు.

హైలైట్స్:

• కాబోయే భార్య పుట్టినరోజును పురస్కరించుకుని లోహగఢ్ కోటకు వెళ్లిన కేతన్ అగర్వాల్.
• ఫోటోలు తీస్తుండగా ప్రమాదవశాత్తు 400 అడుగుల లోయలో పడి మృతి.
• నవంబర్‌లో జరగాల్సిన రాయల్ వెడ్డింగ్ ఆగిపోవడంతో కుటుంబంలో తీవ్ర విషాదం.

Pune Groom Cliff Death  : వివాహ బంధంతో ఒక్కటై, జీవితాంతం కలిసి నడవాలని కలలు కన్న ఒక యువ జంట జీవితంలో ఊహించని విషాదం చోటుచేసుకుంది. కాబోయే భార్య పుట్టినరోజును సంతోషంగా జరుపుకోవాలని ప్లాన్ చేసుకున్న ఒక యువ వ్యాపారవేత్త, ఆ ఆనందం తీరకుండానే మృత్యుఒడికి చేరుకున్నారు.

ఏం జరిగింది? పూణే సమీపంలోని గహుంజే ప్రాంతానికి చెందిన 26 ఏళ్ల కేతన్ విశాల్ అగర్వాల్ ఒక ప్రముఖ రియల్ ఎస్టేట్ సంస్థలో డైరెక్టర్‌గా పనిచేస్తున్నారు. త్వరలో వివాహం జరగనున్న క్రమంలో, గురువారం తన కాబోయే భార్య పుట్టినరోజును స్పెషల్‌గా సెలబ్రేట్ చేయాలని కేతన్ నిర్ణయించుకున్నారు. ఇందుకోసం ఆయన తన కాబోయే భార్యను, ఇద్దరు మిత్రులతో కలిసి మహారాష్ట్రలోని చారిత్రాత్మక లోహగఢ్ కోటకు తీసుకెళ్లారు.

అనుకోని ప్రమాదం: కోటపై వాతావరణం ఎంతో ఆహ్లాదకరంగా ఉండటంతో, ప్రకృతి ఒడిలో కాబోయే భార్య ఫోటోలను అద్భుతంగా క్లిక్ చేయాలని కేతన్ ఆరాటపడ్డారు. దట్టమైన పొగమంచు, వీస్తున్న బలమైన గాలుల మధ్య కోట అంచున నిలబడి ఫోటోలు తీస్తుండగా, ఒక్కసారిగా హోరుగాలి వీచింది. ఆ గాలి తీవ్రతకు కేతన్ తన సమతుల్యతను కోల్పోయి, కాలు జారి సుమారు 400 అడుగుల లోతైన లోయలోకి పడిపోయారు. ఈ ఘటనలో తీవ్ర గాయాలైన కేతన్ అక్కడికక్కడే ప్రాణాలు విడిచారు.

తీరని విషాదం: కేతన్ కళ్ల ముందే లోయలో పడిపోవడంతో కాబోయే భార్య మరియు స్నేహితులు తీవ్ర షాక్‌కు గురయ్యారు. సమాచారం అందుకున్న పోలీసులు, రెస్క్యూ సిబ్బంది వెంటనే ఘటనా స్థలానికి చేరుకుని కేతన్ మృతదేహాన్ని వెలికితీశారు. వీరిద్దరి వివాహం ఈ ఏడాది నవంబర్‌లో రాజస్థాన్‌లోని ఉదయ్‌పూర్ ప్యాలెస్‌లో ఎంతో వైభవంగా జరగాల్సి ఉంది. రాయల్ వెడ్డింగ్‌కు సిద్ధమైన కుటుంబంలో ఇప్పుడు పెళ్లి బాజాలకు బదులు కన్నీరు మిగిలింది.

తన కళ్ల ముందే భవిష్యత్తు భాగస్వామిని కోల్పోయిన యువతి తీవ్ర దిగ్భ్రాంతిలో ఉండగా, గహుంజే ప్రాంతంలో తీవ్ర విషాద ఛాయలు అలముకున్నాయి.