దక్షిణ లెబనాన్లో హెజ్బొల్లా భూగర్భ డ్రోన్ సామ్రాజ్యం.. ఇజ్రాయెల్ సైన్యం కీలక వెల్లడి
ఇజ్రాయెల్-హెజ్బొల్లా మధ్య నెలకొన్న ఉద్రిక్తతల నేపథ్యంలో, దక్షిణ లెబనాన్లో ఇజ్రాయెల్ సైన్యం (IDF) ఒక భారీ భూగర్భ డ్రోన్ కేంద్రాన్ని గుర్తించింది. ఇరాన్ సహకారంతో హెజ్బొల్లా ఈ అత్యాధునిక కేంద్రాన్ని నిర్మించిందని ఇజ్రాయెల్ అధికారులు ఆరోపించారు.
భూగర్భంలో భారీ వ్యవస్థ: ఈ రహస్య కేంద్రం లెబనాన్లోని మజ్దల్ జౌన్ గ్రామం సమీపంలో, ఇజ్రాయెల్ సరిహద్దుకు కేవలం ఆరు కిలోమీటర్ల దూరంలో ఉంది. ఇటీవల చేపట్టిన సైనిక చర్యల్లో భాగంగా కొండ లోపల ఉన్న ఈ సొరంగ వ్యవస్థను సైన్యం బయటపెట్టింది. సుమారు 29 మీటర్ల లోతులో, వందల మీటర్ల మేర విస్తరించి ఉన్న ఈ సొరంగం, హెజ్బొల్లా గతంలో నిర్మించిన వాటి కంటే అత్యంత ఆధునికంగా ఉండటం గమనార్హం. దీనికి భారీ ఉక్కు తలుపులతో పటిష్టమైన రక్షణ కల్పించారు.
భారీ ఆయుధ నిల్వలు: ఈ సొరంగం లోపల డ్రోన్ల తయారీకి అవసరమైన విడిభాగాలు, పరికరాలతో పాటు సుమారు 50 డ్రోన్లను సైన్యం స్వాధీనం చేసుకుంది. వీటిలో ఒక్కో డ్రోన్ దాదాపు 30 కిలోల పేలుడు పదార్థాలను మోసుకెళ్లే సామర్థ్యాన్ని కలిగి ఉంది. వీటితో పాటు సుమారు ఎనిమిది టన్నుల పేలుడు పదార్థాలను కూడా అక్కడ గుర్తించారు. ఈ డ్రోన్లు ఇజ్రాయెల్లోని కీలక ప్రాంతాలను లక్ష్యంగా చేసుకునేలా రూపొందించబడ్డాయని సైనిక అధికారులు వెల్లడించారు.
దాడులకు సిద్ధంగా.. కొండ దక్షిణ భాగంలో ప్రత్యేక డ్రోన్ ప్రయోగ మార్గాలను (launch shafts) ఏర్పాటు చేసినట్లు ఇజ్రాయెల్ గుర్తించింది. యుద్ధ సమయాల్లో భారీ తలుపులను తెరిచి, డ్రోన్లను నేరుగా ఇజ్రాయెల్ వైపు ప్రయోగించేలా హెజ్బొల్లా పక్కా ప్రణాళికతో ఈ వ్యవస్థను సిద్ధం చేసుకుంది. ఈ భారీ డ్రోన్ నిల్వలను పూర్తిస్థాయిలో స్వాధీనం చేసుకోవడం తమకు పెద్ద విజయమని ఇజ్రాయెల్ సైన్యం పేర్కొంది. ప్రస్తుతం ఈ ప్రాంతాన్ని తమ అధీనంలోకి తీసుకున్న ఇజ్రాయెల్, హెజ్బొల్లా నెట్వర్క్లను ఛేదించే దిశగా ఆపరేషన్లను కొనసాగిస్తోంది.
ఈ ఘటనతో ఇజ్రాయెల్ సరిహద్దుల్లో హెజ్బొల్లా భద్రతా పరమైన సవాళ్లను మరింత తీవ్రతరం చేసిందని స్పష్టమవుతోంది.
Leave a Reply